ရသေ့တောင်ဘက်က စက်လှေတစ်စီးနဲ့ ထွက်လာတဲ့မွတ်ဆလင်အမျိုးသမီး ၅ ဦးအပါအဝင် ၉ ဦးကို စစ်တွေတွင် မြန်မာစစ်တပ်ဖမ်းဆီး
နိရဉ္စရာ၊ ဧပြီ ၂၄ ၊ ၂၀၂၆
ရခိုင်ပြည်၊ ရသေ့တောင်မြို့နယ်ဖက်မှ မေယုမြစ်အတိုင်း စက်လှေတစ်စီးနဲ့ အတူ ထွက်လာတဲ့ မွတ်ဆလင် အမျိုးသမီး ၅ ဦးအပါအဝင် လူ ၉ ဦးကို အကြမ်းဖက် မြန်မာစစ်တပ်က ဖမ်းဆီးပြီး နှိပ်စက်မှုတွေ ပြုလုပ်နေတယ်လို့ သတင်းရရှိပါတယ်။
သူတို့ဟာ ဧပြီ ၂၂ ရက်နေ့ နံနက် ပိုင်းအချိန်က စက်လှေတစီးနဲ့ မေယုမြစ်အတိုင်း ထွက်လာစဉ် စစ်တွေအခြေစိုက် ပလ္လင်ပြင်စခန်းက စပီးဘုတ်တစီးနဲ့ မြန်မာစစ်တပ်က လာဖမ်းသွားတယ်လို့ ဒေသခံအမျိုးသား တစ်ဦးက နိရဉ္စရာ သို့ပြောပါတယ်။
"သူတို့က မနက် ၈ နာရီကျော်အချိန်မှာ အဖမ်းခံရတာပါ။ အခုသူတို့ကို ပလ္လင်ပြင်စခန်းမှာ ထားတယ် AA ထိန်းချုပ်နေရာက လာကြတာဖြစ်လို့ နှိပ်စက်ပြီး စစ်ဆေးမှုတွေလုပ်နေတယ်လို့ ကြားပါတယ်။"
အာရက္ခတပ်တော်ထိန်းချုပ်ထားတဲ့ နေရာက လာကြတဲ့ သူတွေဖြစ်နေတဲ့အတွက် နေပူလှန်း၊ လက်သီးနဲ့ ထိုးရုံသာမက အမျိုးသားတွေကို အမျိုးမျိုးနှိပ်စက်ကာ မေးမြန်းစစ်ဆေးမှုတွေ လုပ်နေတယ်လို့ ဆိုပါတယ်။
သက်လတ်ပိုင်း အမျိုးသမီးငယ် တွေကိုလည်း ပလ္လင်ပြင်စခန်းမှာ ထိန်းသိမ်းထားပြီး သူတို့ကို အခုအချိန်ထိ ရဲတပ်ဖွဲ့လက်ထဲကို မအပ်သေးတဲ့အတွက် စိုးရိမ်စရာဖြစ်နေတယ်လို့ အမည်မဖော်လိုသူ မွတ်ဆလင်တစ်ဦးကလည်း နိရဉ္စရာကို ဆက်သွယ်ပြောဆိုပါတယ်။
"အမျိုးသမီး ၅ ယောက်မှာ ၃ ယောက်က ၃၀ ဝန်းကျင်တွေပါ။ စစ်သားတွေက နေ့တိုင်း မူးယစ် သောက်စားနေတဲ့အတွက် အမျိုးသမီးတွေ အတွက် စိုးရိမ်ရပါတယ်။ အမြန်ဆုံးရဲစခန်းကို ဥပဒေကြောင်းအရ လွှဲပေးဖို့လိုပါတယ်” လို့ပြောပါတယ်။
ရသေ့တောင်မြို့နယ်ဟာ လက်ရှိ AA ထိန်းချုပ်ထားတဲ့ နယ်မြေတစ်ခုဖြစ်ပြီး သူတို့တွေဟာ ကူတောင်တိုက်နယ်မှာ တည်ရှိတဲ့ မွတ်ဆလင်ကျေးရွာအချို့က လူတွေဖြစ်ကြပါတယ်။
